Friuli & Lingue

Il Furlan al viaze cun la coriere

Ocjo al furlan su lis stradis de regjon

Di Zenâr a Lui su lis stradis de regjon

IL FURLAN AL VIAZE CU LA CORIERE

Ultin at de campagne promozionâl

de lenghe furlane ideade dal Cirf de Universitât dal Friûl

Ocjo al furlan su lis stradis de regjon. La campagne di promozion de marilenghe, pensade dal Centri Interdipartimentâl di Ricercje su la culture e la lenghe dal Friûl (Cirf) de Universitât dal Friûl, si sierarà cuntun viaç in coriere, di Zenâr fintremai ae metât di Lui,  tra lis provinciis di Udin, Gurize e Pordenon. Cuatri autobus extra urbans, doi che a partissin de stazion di Udin, un di chê di Gurize e un di chê di Pordenon, a ziraran di fat pal teritori regjonâl metint fûr cartei cu la formule “F=MC2  Furlan mieç di comunicazion al cuadrât”.

La scree de campagne di promozion de lenghe e je dal prin di Novembar dal 2006: di chê volte, la campagne si è disvilupade midiant di spots publicitariis trasmetûts tes salis cinematografichis plui grandis de regjon, ma ancje in gracie di messaçs pe radio, di publicazions su gjornâi specifics e su la cjarte stampade, o cu la distribuzion di cartulinis e di segnelibris, adesîfs e manifescj. Par ducj i interessâts, i materiâi si distribuissin al Cirf (www.uniud.it/cirf), li de Universitât, in vie Petracco 6, a Udin. Inte stesse sede si pues usufruî dai servizis dal Sportel di lenghe furlane, che si pues contatâ ancje la numar 0432 5564580, o pûr vie e-mail (cirf@uniud.it). La campagne promozionâl «e je stade – e comente Piera Rizzolatti, diretore dal Cirf – une biele prove pal Cirf e pal Ateneu di Udin. Pe prime  volte o vin vût a ce fâ cuntune campagne in grande scjale pe promozion de lenghe furlane, leade al mont de tecnologjie, de sience e de inovazion».

«La formule F=MC2 – e spieghe Priscilla De Agostini dal Cirf, coordenadore dal progjet -, che e ven di chê di Einstein E=MC2, sinonim universâl di discuvierte sientifiche, e rimarche l’aspiet une vore inovatîf dal doprâ il furlan tant che lengaç sientific, tecnologjic e filosofic». Tai ultins agns, il studi, la ricercje continue, lis publicazions dal setôr, come cualchi riviste sientifiche in lenghe furlane, e il fat di vê prontât imprescj linguistics specifics, «a àn contribuît – e rimarche Rizzolatti - al procès di insiorament continui e di evoluzion dal furlan». «La lenghe furlane – e siere De Agostini – e à vuê la pussibilitât di rapresentâ ad implen la realtât e di afrontâ nivei alts e diversificâts di comunicazion, e la discuvierte di cheste gnove formule F=MC2, dute par furlan, e je sore il dut un ricognossiment des potenzialitâts concretis di cheste lenghe».

Udin, 24 Zenâr dal 2007                                                                                  

Ufici stampe

• » Invia tramite EMAIL
• » Versione per la STAMPA
• » Le vostre opinioni

I link correlati all'argomento

• Occhio al Friulano!
• "Nojo vulevan savuar..."