Po cantu spetat a sa setzioni de sa Poesia, sa giurìa at sceberau a Battistina Biggio po su primu prèmiu, a Rosanna Podda po su segundu i a Domènicu Battaglia po su de tresi. Sinnalada s'obra de Giuanni Francu Garrùcciu.

 Invecis in sa setzioni intregada a sa Prosa, at bintu su scridori dorgalesu Gonàriu Carta-Brocca, su segundu prèmiu est andau a Manueli Caredda de Ceraxus e su de tresi a Gigi Tatti de Arbus cun su contu Su molenti de Matzeni. Sinnalau puru su contu de Càralu Mulas.

Po cantu spètat sa setzioni arriservada a is Poetas de Dèsulu, anti premiau is componimentus de Giuanni Gioi, de Antoni Concas e de Luisu Floris.

Atrus prèmius dus anti bintus is piciocus de is iscolas elementaris de Dèsulu, ki anti prenu sa palestra de sa scola professionali cun allirghia e prexu.

A primu ki sa tzirimònia de premiadura cumintzèssit, Marinella Carosso at presentau su libru La généalogie muette. Résonance autour de la transmission en Sardaigne. Cust'obra, bessia po imoi in editzioni frantzesa sceti, est s'arresurtau de una busca antropològiga cun sa genti de Dèsulu.

Ma ita est sa "genealogìa citìa"? De ita kistiònat custu stùdiu scentìfigu ki tenit bisura de sàbiu literàriu?

Sa studiada piemontesa at spricau ki su libru kistiònat de su ki nanta s'arèu (erereu, aredeu, eredeu in is àteras fueddadas) est a nai su "liòngiu de sànguini" ki acàpiat is gentis de sa matessi famìllia.

Custu fueddu intrau in sa Lìngua Sarda, forsis de su Catalanu, depit essi lìgiu e pigau in consideru - at nau Marinella Carosso - po ndi podit cumprendi de prus de sa genti de Dèsulu.

Ke àterus fueddus sardus (su connotu e sa sienda in primis) s'areu est unu strumentu de comunicatzioni muda, citia. Un' aina, o mellus, unu "skema" prenu de sinnificau fora-verbali.

S'arèu est duncas una crai ki si permitit de ndi bessiri prus arricaus in sa connoscèntzia de sa sardidadi.

Càstia i ascurta sa bìdeu-noa: