Inserisci i termini di ricerca Invia modulo di ricerca

D'happu posta tant'attras bortas custa chistioni (ma... a cuss'origa no intendint) po sa cali happu sempri domandau: poita is sardu de su Campidanu, po finzas tra is " concas mannas", si sunti arrendius  a s'usu innaturali de narri e iscriri "sa limba sarda", "sa die" ...invecis de narri e iscriri prus naturalmenti, a sa campidanesa: "sa lingua sarda", "sa di"..?

Forzis  mi seu indromiscau po unu pagh e' tempus e candu mindi seu iscidau happu agattau sa trassa giai cuncordada asuba de sa "Lingua Sarda"! Già... happu agattau "scienziaus" e grandus "studiosus" setzius e riunius a pensai e discuttiri po cumenti a...ca "unificai" sa lingua sarda:

"Sa lingua Sarda unificada"... bellus custus fueddus po incantai is alloccus!  Happu intendiu puru a...ca in s' "unificazioni" a ci rimitti "linguisticamenti" seus nosus campidanesus! Giai de custu puntu cumprendu cument' hat andai a finiri custa riunioni de "studiu"!

Ma po no parri su ghi fait su "scuncordagiogus", lasseus chi siant is cosas e su tempus a ponni su giustu riparu, ma in su mentris, mellus dormiri a un'ogu serrau e s'attru abertu e a origas beni sprappaddadas! 

Una cosa est zerta: cun tottu sa stima chi allogu po is amigus-fradis sardus logudoresus, (ma issus ita c'intrant?) de is calis si deppit riconosci'  teniri unu bellu e nobili linguazzu e si puru  mi praxit tantu su sardu-logudoresu, candu, però, ddu fueddant is de su logu ettotu o, candu, finzas deu ettotu, cumenti attori, deppu rezitai unu branu o una poesia in custa varianti,  ma  in sa quotidianidadi, essendi "campidanesu", no creu chi nisciunus mi pozzat criticai o biasimai si difendu is originis linguisticas mias e no a improddai unu linguazzu  imbentau de calincunu!

Happ' a narri e iscriri naturalmenti e sempri: "sa lingua sarda" e "sa di". De su restu c'est de osservai puru un'attru aspettu: a ita serbit narri o iscriri "limba sarda"...? Si est limba, ita nezessidadi c'est de acciungiri "sarda"?  Forzis po no dda cunfundi cun sa "limba... milanesa"...? Cun tottu sa potenzia de su mèri Berlusconi, mi parit diaderus improbabili chi pozzat traformai sa vogazza in civraxu! 

Duncas, mellus a sighiri su dicciu chi narat: "pezza cotta e pezza crua, donni unu in domu sua".

E... s' "unificazioni"? Nosus tra  sardus si seus sempri cumprendius a pari: chi tenit origas, intendat.

Mario Medas