1.
In Elia nascistis
Acanta de Antiochia
E donau a idolatria
Finzas a trint'annus bivistis
A su tempus chi movistis
Contra Sardigna orgogliosu.
Liberanoisi ecc...

2.
Armau de crudeli zelu
Arribais a Benaventi
Aundi, accampada sa genti
Os fueddat Deus de su xelu;
Ponendusì in prus de svelu
Unu raiu e tronu spantosu.
Liberanoisi ecc...

3.
A su Imperiu Soberanu
A su tronu, raiu e luxi
Bieis in s'aria una gruxi
E un'atera in sa manu
Aturdiu a bonu mengianu
Partisti meda poderosu.
Liberanoisi ecc...

4.
In Gaieta differenti
Tottu giai de su chi fustis
Osi feis unu pagu appustis
Cristianu segretamenti.
Cun tottu s'armada genti
Sigheisi allirgu e gustosu.
Liberanoisi ecc...

5.
A s'intrada in Arborea
Incontrastis resistenzia
E bosu cun passienzia
Luegu mudastis s'idea
Passendi a fai pelea
A sa Ogliastra carignosu.
Liberanoisi ecc...

6.
Capitanu già valenti
De Deus cun talis azionis
Suggetastis is Nazionis
de sa prus barbara genti;
E de innì gloriosamenti
A Casteddu vittoriosu.
Liberanoisi ecc...

7.
Isciendu s'Imperadori
Custa santa mutazioni
Iscritta os ponni in presoni
Cun ira rabbia e furori
Ma s'Angelu de su Signori
Os visitas quidadosu.
Liberanoisi ecc...

8.
Giuliu iniquu Presidenti
Cumandat chi a bastonadas
Is palas bostas sagradas
Os seghint incontinenti
E mudu in mesu a sa genti
Sias oggettu bregungiosu.
Liberanoisi ecc...

9.
Non cuntenta custas penas
Cussu iniquu Presidenti
Cun puntas de certu callenti
Os raschiat nerbiu e venas
Cun respiru essendu appenas
Su corpu bostu di losu.
Liberanoisi ecc...

10.
Luegu os torrat cun premura
A presoni un'atera orta
Aundi s'Angelu os cunfortat
E de totu giai osi curat
Parendu cussa grutta oscura
Unu Xelu luminosu.
Liberanoisi ecc...

11.
Giulio Prefettu atturdiu
De osi biri aicci sanu
Po chi tenestis prus sa manu
De s'idolu destruiu
De Sardigna ses fuiu
A su istanti timorosu
Liberanoisi ecc...

12.
Su successori Flavianu
Pustis de setti turmentus
Inumanus e sagrientus
Os cundennat po Cristianu
E bosu allirgu euffanu
Abbrazais sa morti gustosu.
Liberanoisi ecc...

13.
Custu barbaru infiamau
A vista de tanti passienzia
Os fulminat sa sentenzia
D'essi in Nora degugliau
E de su Xelu animau
Offreis su zugu preziosu.
Liberanoisi ecc...

De Casteddu appassionau
Sempri siais difensori
Sighi a essiri intercessori
EFIS Martiri sagrau.