Inserisci i termini di ricerca Invia modulo di ricerca

BANDU DE CUNCURSU

Su "Prèmiu Otieri", fundadu dae Toninu Ledda in su 1956, s'interessat, dae pius de chimbanta annos, de atividades in agiudu a sa cultura, a sa limba e a sa literadura de Sardigna.

Regulas de partecipatzione comunes a totu sas setziones

• Sos trabàglios devent arrivire intro su 15 de Cabudanne de su 2008 (s'at a tènnere contu de sa data de su timbru de sas postas). Non fatedas racumandadas. Già arrivint etotu.

• Sunt ammissos a su Prèmiu trabàglios iscritos in ogni variedade de sa limba sarda, fintzas in sas eteroglossias internas e in sardu-corsu. Diat fàghere piaghere si s'autore leat in consideru sas règulas chi a tempus sou at bogadu a pizu su Prèmiu. Si podet finas impitare sa Limba Sarda Comuna.

• Sos tribàglios devent giùghere iscritu in pees de s'ultimu fògliu, nùmene e sambenadu de s'autore, data e logu de nàschida, s'indiritzu giustu e su nùmeru de telèfono ue si diat chèrrer giuiladu. Si podet imbiare finas calchi riga de "curriculum".

• Totu sos trabàglios devent èssere imbiados in 9 (noe) còpias giaras, chi si potant lègere bene.

• Si racumandat de impitare fòglios de formadu A4 (cm. 21x29,7), lassende una doa de nessi duos centìmetros a s'ala manca pro sa regolta chi s'at a fàghere.

• Sos fòglios non cherent incollados, e nemmancu cosidos a pare. Dade nos los prontos a los partire pro los dare a sa giuria. Agradessimus cussizos pro mezorare su Prèmiu. Poinde nos los a banda intro sa busta, chena los cosire a sos trabàglios chi imbiades a su cuncursu.

• Totu sas fainas ant a èssere inèditas e non devent àere àpidu reconnoschimentos in àteros cuncursos literàrios a sa die chi los sezis imbiende a nois.

Sos prèmios de su cuncursu

S'ant a dare prèmios in dinari a sos primos tres classificados de ogni setzione, a cunfromma a sas disponibilidades de su Prèmiu. Podent èssere assignados prèmios ispetziales. Sas poesias e sos contados premiados paris cun cussos chi sa giuria dessignat de imprentare, ant a èssere postos in su cuadernu annuale chi dae ocannu at a torrare a bessire.

Emigrados

In mesu a sos emigrados chi ant a resessire a leare reconnoschimentos dae sa giuria in sas setziones de ocannu, ant a rezire sa "Coppa Messaggero Sardo" unu o duos autores.

Su giudìtziu de sa giuria est insindacabile.

SETZIONES

Poesia sarda inèdita "Antoni Sanna"
Ogni cuncurrente podet imbiare una poesia a tema lìberu (cun rima o chentza rima). Si devet imbiare finas una còpia de sa tradutzione in limba italiana, chi unu cras devet essere posta a disponimentu de sos istudiosos. Sos chi iscrient in saligheresu o in tabarchinu, devent imbiare 9 (noe) còpias de sa tradutzione in limba italiana. Si racumandat de non nch'essire dae su lìmite de 40 (baranta) versos. Foras de sa busta, bi deves iscrìere: Setzione Poesia Sarda Inedita.

Prosa "Anghelu Dettori"
Ogni cuncurrente podet imbiare unu contadu o cale si siat iscritu in prosa, a tema lìberu. Sas fainas chi imbiades devent càbere, dae pius a mancu, in 5 (chimbe) pàginas iscritas a màchina o a computer. Si devet imbiare finas una còpia de sa tradutzione in limba italiana, pro sas cajones chi amus nadu in antis. Ogni còpia devet èssere cosida e pronta a la seberare pro sa giuria. Foras de sa busta, bi deves iscrìere: Setzione Prosa.

Tra poesia e càntigu "Antoni Cubeddu"
Destinada a sa poesia cantada o de cantare. Ogni cuncurrente podet imbiare unu cumponimentu a tema lìberu, sighende sos ischemas e sas formas poèticas e mètricas ligadas a sa traditzione (comente: nìnnidos, atìtidos, gosos, modas, mutos, repentinas etc.). In custa setzione non bi cheret sa tradutzione in limba italiana, ma est agradessidu meda si nos imbiades unu glossàriu cantu pius cumpletu, pro dare importu a sos limbazos de ogni bidda. Nos ant a fàghere piaghere, pro lo contivizare in su Centru de Documentatzione, finas sas indicatziones chi s'autore nos cherzat imbiare subra sos ischemas antigos e sas formas poeticas chi at impreadu, leende in cunsideru sas traditziones de Sardigna e finas cussas pius nòdidas de sa bidda de s'autore.
Foras de sa busta, bi devides iscrìere: Setzione "tra poesia e càntigu".

Poetas e iscritores dialetales de Italia
Est una setzione isperimentale e istraordinaria, cun sa cale cherimus abberrer una janna a sos amigos de su Sotziu A.N.PO.S.DI. (Associazione Nazionale Poeti e Scrittori Dialettali d'Italia), cun sa cale amus dae temporios abbojos de istima e de amistade. Sa premiatzione at a esser in ultimos de annu, umpare a un'imbeniu ue s'at a arrejonare de limbazos, de minorias limbisticas e de problemas de s'identidade. Pro issos amus imbiadu unu bandu... a banda.

Avertèntzias

• A leare parte a su cuncursu est a s'indonu e non benit pedida tassa peruna
• Un'autore podet leare parte a una o a pius de una setzione de sas chi sunt in cuncursu
• Sos autores premiados cun su Primu Prèmiu podent torrare a bìnchere in cussa setzione solu a pustis de tres annos
• Sas fainas non benint torradas in segus e su Comitadu si reservat ogni deretu de las publicare cando e comente podet capitare, finas in sa ràdio, in sa televisione e in Internet, chentza pagamentu perunu. S'autore restat proprietàriu de sa faina chi at iscritu.
• Leende parte a su cuncursu, cheret nàrrere chi benint atzetadas dae s'autore sas règulas chi bos amus dadu a connòschere.

PREMIATZIONE

Sa premiatzione at a bènnere fata in atunzu de su 2008. Sa die giusta s'at a connòschere cun sos mèdios giornalìsticos. Avertimus dae como chi sos autores ebbia chi ant a leare reconnoschimentos dae sa giuria, ant a retzire cun tempus una lìtera a domo issoro.

GIURIA

Nicola Tanda / Presidente
Clara Farina / Componente
Franco Fresi / Componente
Dino Manca / Componente
Paolo Pillonca / Componente
Anna Cristina Serra / Componente
Salvatore Tola / Componente
Antonio Canalis / Componente e Segretario

Segreteria de su Premiu
Via U. La Malfa 28 - 07014 Ozieri (SS)
Tel. 079.77.02.44

Centru 'e Documentatzione de sa Literadura Sarda "Tonino Ledda"
Via Amsicora 5/7 - 07014 Ozieri (SS)

Premio Ozieri di letteratura sarda edizioni 2006 e 2007